AKG Acoustics

AKG Acoustics
Tipe	GmbH
Gestig	1947 in Wene, Oostenryk
Hoofkantoor	Northridge, Los Angeles,  Verenigde State
Industrie	Klanktegnologie
Produkte	Mikrofone, koptelefone
Werknemers	170
Moedermaatskappy	Harman International Industries
Webwerf	AKG

AKG Acoustics is 'n Oostenrykse vervaardiger van mikrofone en koptelefone vir professionele gebruikers (toneel- en ateljeetegnologie) en tuisgebruik.

Die onderneming is in 1947 onder die naam Akustische und Kino-Geräte Gesellschaft m.b.H. deur Ernst Pless en Rudolf Görike in Wene gevestig en het hom aanvanklik op die vervaardiging van filmprojektors, luidsprekers, klankvertragingstoestelle en mikrofone toegespits. Reeds enkele maande ná AKG se stigting het sy mikrofone uit die AKG Dyn-reeks, wat destyds deur net vyf medewerkers handvervaardig is, gewild geraak by radiostasies, teaters en jazzklubs. Dié historiese mikrofone is tans, onder meer vanweë hul estetiese ontwerp, gesogte versamelaarstukke.^[1]

In 1949 het AKG sy eerste koptelefoon bekendgestel, en in die vroeë 1950's het die jong onderneming 'n deurbraak behaal met produkte soos die wêreld se eerste dinamiese sangmikrofoon wat met plastiekmembraantegnologie vervaardig is, die eerste grootmembraan-kondensmikrofoon en die eerste dinamiese mikrofoon met afstandbediening. Een van AKG se eerste klante vir die befaamde C 12-mikrofoon was die Britse uitsaaier BBC. Weens sy buitengewone bydrae tot die Oostenrykse ekonomie is aan AKG in 1963 die reg verleen om die Oostenrykse staatswapen te voer.^[2]

In die 1970's het Pless sy aandeel aan die Nederlandse tegnologiereus Philips verkoop wat dit op sy beurt in die 1980's aan 'n houermaatskappy in besit van die nyweraar Josef Taus verkoop het. In dié tydperk was AKG die Oostenrykse verspreider van gesiene hoëtrou-handelsmerke soos Marantz en Revox. Binne die bestek van die Austromir-navorsingsprojek is AKG-produkte in 1991 in die ruimtevaart gebruik. Die Oostenrykse ruimtevaarder Franz Viehböck was by die Audimir-eksperiment betrokke waartydens navorsing oor klankgebaseerde oriëntasievermoë in die Russiese ruimtestasie Mir gedoen is.

Weens sy beleid van aggressiewe uitbreiding en die oprigting van 'n nuwe hoofkwartier in Wene het AKG vervolgens in finansiële moeilikhede beland. Baie medewerkers is afgedank, en net vanweë die belangstelling van Sidney Harman, die stigter van die Amerikaanse Harman-groep, kon bankrotskap op die laaste oomblik afgewend word. In 1993 is AKG Acoustics deur Harman International Industries vir 'n simboliese bedrag van 1 Oostenrykse sjieling oorgeneem.

AKG-produkte is tradisioneel in Oostenryk vervaardig. Weens laer produksiekoste in die buiteland is die vervaardiging van meer gesofistikeerde produkte intussen na Slowakye en dié van intreevlakprodukte na China uitgeplaas. In September 2016 het Harman as moedermaatskappy aangekondig dat die laaste AKG-aanlegte in Oostenryk - waaronder 'n fabriek in Wene se Laxenburgerstraße met omstreeks 130 medewerkers - teen die middel van 2017 gesluit sou word. AKG se Weense filiaal met 170 medewerkers sou hom op navorsing en ontwikkeling, bemarking, verkoop en die vervaardiging van premium-produkte toespits. Vir Samsung Electronics, die huidige moedermaatskappy van Harman International Industries, se premium-tabletrekenaar Galaxy Tab S-reeks verskaf AKG vier stereoluidsprekers.^[3]

Met die oorname van Harman deur Samsung Electronics is die hoofkwartier van AKG in 2017 na Northridge, Los Angeles verskuif. AKG se vervaardigingsaanleg in die Weense stadsdeel Liesing met 131 werknemers is reeds in 2016 gesluit. 22 voormalige personeellede het op 1 Julie 2017 hul eie onderneming gestig, Austrian Audio.^[4]