Bigos

Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas.

Bigos
Bigos, soos dit op Krakau se hoofmarkplein bedien word
Oorsprong	Pole
Bedien as	Voor- of hoofgereg
Hoofbestanddele	Kool en vleis
Variasies	Talle variante

Bigos is 'n tradisionele bredie wat deel uitmaak van die Poolse, Litause, Wit-Russiese en Oekraïense kookkuns. Dit word as die nasionale gereg van Pole en Oekraïne beskou.

Daar is geen enkele resep vir die geurige gereg waarvoor kool en vleis as basis dien nie - elke streek en selfs elke gesin het sy eie spesiale resep vir die bereiding van bigos. Tipiese bestanddele sluit kool, suurkool, verskeie soorte vleis en wors, dikwels hele of gepureerde tamaties, heuning en sampioene. Die gewildste soorte vleis is varkvleis (wat dikwels gerook word), ham, spek, worsies, kalf- of beesvleis en - omrede bigos eintlik as 'n tipiese jagtersgereg beskou word - wildsvleis.

Speserye, wat vir bigos gebruik word, kan peper, jenewerbessies, lourierblare, marjolein, pimento (kersiepepers), gedroogde of gerookte pruime wees.

Bigos word gewoonlik met aartappelpuree of rogbrood bedien. Net soos ander bredies kan bigos in 'n koel plek of in die diepvrieskas bewaar en later weer opgewarm word. Die geur van bigos verbeter sodoende nog. Volgens 'n ou tradisie word bigos selfs 'n week lank in 'n pot gekook en voortdurend met nuwe bestanddele aangevul. Bigos het vanweë dié metode, die seisoenale beskikbaarheid van kool en sy hoë vitamien C-inhoud in Pole en elders 'n stapeldis in die koue wintertyd geword. In Poolse gesinne word dit tradisioneel op Tweede Kersdag bedien.

Bigos verskyn op die spyskaarte van baie Poolse restaurante en is ook 'n gewilde wegneemete, maar indien nie genoeg tyd aan die voorbereiding daarvan bestee word nie, sal restaurant- en wegneem-variante nouliks met selfgemaakte bigos kan meeding.