Bloemfonteinse Normaalkollege

Die Bloemfonteinse Normaalkollege was onder verskeie name en in verskillende gedaante by 'n eeu lank 'n opleidingsinstelling vir onderwysers in die Vrystaatse hoofstad, Bloemfontein.

Die Normaalskool is op 12 Oktober 1898 ná dr. John Brebner se aanbevelings aan die Vrystaatse Volksraad met P.J. du Pré le Roux as hoof geopen. Ná die Tweede Vryheidsoorlog (1899–1901) het die skool op 1 Augustus 1902 as die Normal School heropen met me. E.M. Firks as hoof. In 1912 is die Kollege herdoop tot die Normaal- en Politegniese Kollege, maar toe die nuwe hoofgebou op 8 Februarie 1916 betrek word, is die politegniese gedagte laat vaar.

Afrikaans is vanaf 1919 gedoseer, en as onderrigmedium is dit onder die rektorskap van dr. C.F. Visser (1929 tot 1942) ingevoer. Op 6 Desember 1944 het die Normaalkollege die fakulteit van opvoedkunde van die Universiteitskollege van die Oranje-Vrystaat geword en in 1951 is dit herdoop tot die Onderwyskollege van die UOVS. Losmaking van die UOVS het op 16 Junie 1965 plaasgevind toe die naam Bloemfonteinse Onderwyskollege aanvaar is.

• (af) Swart, dr. M.J. (voorsitter redaksiekomitee). 1980. Afrikaanse kultuuralmanak. Aucklandpark: Federasie van Afrikaanse Kultuurvereniginge.