County

'n County is 'n administratiewe onderafdeling en juridiese gebied in sekere lande.

Die huidige Engelse term het sy oorsprong op die vasteland van Europa en is afgelei van die Franse comté ("graafskap"). Net soos sy ekwivalente in ander Europese tale (contea, contado, comtat, condado, Grafschaft, Gau en ander) het dit na 'n juridiese gebied verwys wat onder die heerskappy van 'n graaf gestaan het.

Toe die Normanne in 1066 Engeland verower het, het hulle die Franse term comté saamgebring. Maar op die Britse Eilande was die term earl (afgelei van Oud-Noors jarl) lankal gebruiklik nadat groot dele van die eilande deur Wikings beheer is. So is die terme earl en earldom hier as ekwivalente van die Kontinentaal-Europese graaf (Frans comte) en graafskap (comté) beskou. Die later ingevoerde term het dus 'n sinoniem vir die inheemse Engelse woord scir [ʃir] of, in moderne Engelse, shire geword.

Aangesien 'n shire 'n administratiewe onderafdeling van die koninkryk was, het die term county geleidelik sy huidige betekenis van 'n administratiewe onderafdeling van huidige regerings gekry. In federale lande soos die Verenigde State en Kanada fungeer counties as administratiewe onderafdelings van deelstate, gemenebeste (commonwealths) of provinsies - die tweedevlak-regerings.

'n County kan verder verdeel word in (civil) townships of ander administratiewe jurisdiksies wat deur die county beheer word. Binne die grense van 'n county is daar gewoonlik, maar nie altyd nie, 'n verskeidenheid van munisipale korporasies soos cities, villages en towns.

Afhangende van nasionale wetgewing word munisipaliteite regstreeks of indirek deur die county beheer. So val munisipaliteite in die Verenigde State gewoonlik nie onder die gesag van 'n county nie, alhoewel administratiewe liggame en agentskappe van 'n county-regering sekere politieke prosesse in die verhoudinge tussen plaaslike munisipale en deelstaatregerings hanteer.

In die Verenigde Koninkryk is die name van talle counties van die plaaslike county-hoofstad afgelei waaraan die agtervoegsel -shire geplaas word, soos byvoorbeeld Gloucester in Gloucestershire en Worcester in Worcestershire.

• County (Verenigde State)
• Graafskappe van Engeland