Danziger Goldwasser

Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas.

Danziger Goldwasser (Duits, letterlik "Goudwater uit Danzig") is 'n kruielikeur wat oorspronklik deur die likeurfabriek Der Lachs zu Danzig vervaardig is en bekend staan vir die stukkies bladgoud wat by die drank gevoeg word. Die fabriek Der Lachs is in 1598 deur die Nederlandse immigrant Ambrosius Vermollen gestig.

Terwyl Danziger Goldwasser nog steeds in die huidige Poolse stad Gdansk gekoop kan word, word dit sedert die einde van die Tweede Wêreldoorlog nie meer plaaslik gedistilleer nie. Die oorspronklike handelsmerk Der Lachs word tans deur die Duitse aandelemaatskappy Hardenberg-Wilthen AG in Nörten-Hardenberg vervaardig en versprei.

As gevolg van tegniese vooruitgang op die gebied van distillering het die vervaardiging van alkoholiese dranke, wat uit kruie en speserye berei is, in die 17de eeu sterk toegeneem. Soms is stukkies bladgoud of bladsilwer by hierdie soort dranke gevoeg - moontlik om die genesende effek te versterk wat aan hulle volgens die destyds moderne alchemistiese geneeskunde toegeskryf is, maar miskien ook as demonstrasie van rykdom.