Elim, Wes-Kaap

Elim
'n Straat in Elim
Elim  Elim se ligging in Wes-Kaap
Koördinate: 34°35′30″S 19°45′30″O / 34.59167°S 19.75833°O / -34.59167; 19.75833
Land	Suid-Afrika
Provinsie	Wes-Kaap
Distrik	Overberg
Munisipaliteit	Kaap Agulhas
Stigting	1824
Oppervlak [1]
• Totaal	28,33 km2 (10,94 vk. myl)
Bevolking  (2011)[1]
• Totaal	1 412
• Digtheid	50/km2 (100/vk. myl)
Rasverdeling (2011) [1]
• Wit mense	1.0%
• Bruin mense	91.6%
• Swart mense	7.4%
Taal (2011) [1]
• Afrikaans	94.1%
• Engels	3.6%
• Ander	2.3%
Poskode (strate)	7284
Poskode (posbusse)	7284

Elim in die Strandveld in die Overberg is 20 km suidwes van Bredasdorp geleë. 'n Opvallende kenmerk van die dorp is die witgekalkte rietdakhuise met hul lae werfmure, groentetuine, leislote en vybome.

Toe die sendingstasie by Genadendal te groot raak, besluit die Morawiese Sendinggenootskap in 1824 om die plaas Vogelstruyskraal van Louis du Toit aan te koop om daarop 'n nuwe sendingpos te stig. Op die naam Elim is besluit na aanleiding van Ex. 15:27. Op die dorre Agulhas-kusvlakte was genoeg vars water uit die Nuwejaarsrivier beskikbaar. Hans Pieter Hallbeck was die stigter-sendeling.

Die ou plaashuis van Vogelstruyskraal staan nog aan die westekant van die dorp. In 1974 is die watermeul van 1828 tot nasionale monument verklaar. Hier is die koring van die omgewing gemaal. Voor die biblioteek staan die enigste monument in die land wat die vrystelling van die slawe in 1834 in Suid-Afrika gedenk. Die kerkklok het 'n unieke meganisme en is reeds sedert 1764 in Herrnhut gebruik en is in 1914 hier geïnstalleer.

Omdat die Morawiese kerk die eienaar van die grond is, kon die kerk lank sy oorheersende invloed in die gemeenskap handhaaf. Die sendelinge het nie slegs die Evangelie gebring nie, maar ook hul gemeentelede in allerlei vaardighede onderrig. Daarom het Elim bekend geword vir sy rietdekkers, messelaars en skrynwerkers. Boere verbou vrugte (o.a. druiwe) en groente en hou vee aan. In 'n fabriek word fynbos insluitende dekriet en hakea gedroog vir die uitvoermark. Reeds meer as 150 jaar word sewejaartjies (Helichrysum en Helipterum spp.) gedroog vir Europese bloemiste. Erica regia, die Elim-heide, groei in die omgewing.

Met die amptelike sensus van 1891 was hier 1 150 inwoners. Die huidige inwonertal word op 1 400 beraam.

• Lys van dorpe in Suid-Afrika

• Howard, Leslie en Phillips, Keith: Overberg Tapestry. BPR Publishers. ISBN 0-958-47661-6
• Standard Encyclopaedia of Southern Africa, deel 4. Kaapstad: Nasou, 1971. ISBN 0-625-00320-9

• Reis in Afrikaans - daar is maar één Elim Geargiveer 27 September 2007 op Wayback Machine