Encyclopedia Lituanica

Die Encyclopedia Lituanica is 'n Engelstalige ensiklopedie in ses boekdele met meer as 3 600 bladsye oor Litaue en Litause onderwerpe. Dit is tussen 1970 en 1978 deur Litause emigrante, wat hul tuisland ná die einde van die Tweede Wêreldoorlog verlaat het, in Boston, Massachusetts uitgegee. Hierdie ensiklopedie is tot vandag toe die omvattendste werk oor Litaue wat in Engels gepubliseer is.

Die redakteurs van Encylopedia Lituanica het al vroeër, tussen 1953 en 1966, Lietuvių enciklopedija, 'n algemene Litause ensiklopedie in 35 boekdele, saamgestel. Later is nog twee bykomende boekdele met bywerkings en aanvullings gepubliseer. Die 37ste en laaste boekdeel het in 1985 verskyn. Die versameling van inligting is deur die feit bemoeilik dat die meeste bronne en naslaanwerke destyds agter die ystergordyn in die Sowjetunie bewaar is en soedoende vir die redakteurs nie toeganklik was nie.

Baie van die Encyclopedia Lituanica se inskrywings baseer op ouer artikels in die Lietuvių enciklopedija. Sowat twee vyfdes van dié ensiklopedie se inhoud behandel Litause onderwerpe. Die artikels is sodoende eers in Litaus saamgestel en later na Engels vertaal. Resensente het die hoë gehalte van die vertalings in 'n wetenskaplike tydskrif bevestig.^[1]