Gereformeerde kerk Empangeni

Gereformeerde Kerk Empangeni
Sluit in	Amatikulu Empangeni Eshowe Felixton KwaMbonambi Mtubatuba Mtunzi Richardsbaai St. Lucia
Denominasie	Gereformeerde Kerk
Klassis	KwaZulu-Natal
Huidige predikant(e)	H.J. Coetzee (Herman)
Belydende lidmate	54
Dooplidmate	8
Adres	Dunnweg 20, Empangeni
Geskiedenis
Stigtingsdatum	1958
Afgestig van	Noord-Durban
Eerste predikant	P.G.L. van der Walt (1959–'65)

Die Gereformeerde kerk Empangeni is, soos die naam aandui, ’n gemeente van die Gereformeerde Kerke in Suid-Afrika op die KwaZulu-Natalse dorp Empangeni, maar dit sluit ook omliggende dorpe soos Mtubatuba, Eshowe, Melmoth, Richardsbaai en St. Lucia in.

’n Klein groepie lidmate in Zoeloeland het met visie en die ywer om dit ’n werklikheid te maak reeds in 1950 ’n erf op Empangeni gekoop met die oog daarop om later ’n kerkgebou op te rig. Met die afstigting van die Gereformeerde kerk Empangeni van Noord-Durban in 1958, het die lidmate dadelik ’n boukommissie in die lewe geroep. Nadat verskeie planne oorweeg is, het die kommissie besef hulle sou vir eers met net ’n saal tevrede moes wees. In 1968 is die argitek Carl Mouton, van die firma Boogertman, Brink & Mouton, se dienste bekom. Hy het ’n ontwerp voorgelê wat dit moontlik sou maak om die saal, konsistorie en toilette te bekostig en boonop ’n deel van die kerk (met net vyf banke) te bou, wat later maklik vergroot sou kon word. Die bouaannemer was Tienie van Staden.

Empangeni het einde 1997 276 belydende lidmate gehad, maar teen einde 2014 het dit afgeneem tot 122. Die NG Kerk het min of meer agt gemeentes, saamgetrek in die Ring van Melmoth, in die gebied wat ooreenstem met dié van die Gereformeerde kerk Empangeni. Dié ring het einde 2014 3 838 belydende lidmate gehad, vergeleke met 5 264 einde 2001. Die Hervormde kerk het op 21 Junie 1968 ’n gemeente Empangeni gestig, wat einde 2014 127 belydende lede gehad het. Die Hervormde gemeente Richardsbaai is op 15 Januarie 1978 gestig. Dié gemeente het einde 2014 381 belydende lede gehad.

Tydens die samesmelting van die Klassisse KwaZulu-Natal-Suid en -Noord het die gemeente op 12 Maart 2024 deel geword van die nuwe klassis.

1. Van der Walt, Pieter Gert Lodewyk, 1959–1965 (in kombinasie met Noord-Durban)
2. De Klerk, Pieter Bouman, 1966–1974 (in kombinasie met Noord-Durban)
3. Maré, Roelof, 1974–1977
4. Lotter, dr. George Adrian, 1978–1983
5. Kruger, Izak Jacobus Vorster, 1983–1986
6. Du Preez, Jan Adriaan, 2008–2009
7. Steyn, Karel Petrus, 2010–2012
8. Van der Walt, Johann George, 2013 – 2021
9. Coetzee, Hermanus Jacobus, 31 Augustus 2024 - hede

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1958. Almanak van die Gereformeerde Kerk in Suid-Afrika vir die jaar 1959. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.