Judenburg

Judenburg
Kaart	Wapen
	Vlag
Land	Oostenryk
Deelstaat	Stiermarke
Koördinate	47°10′21″N 14°39′37″O / 47.17250°N 14.66028°O / 47.17250; 14.66028
Stigting	1074 (eerste verwysing)
Oppervlakte:
- Totaal	63,77 vk km
Hoogte bo seevlak	737 m
Bevolking:
- Totaal (1 Januarie 2019)	9 899
- Bevolkingsdigtheid	155,2/vk km
Tydsone	UTC +1 (MET)
- Somertyd	UTC +2
Burgemeester	Hannes Dolleschall (SPÖ)
Amptelike Webwerf	Stadtgemeinde Judenburg

Judenburg is die administratiewe setel van die distrik Murtal in die Oostenrykse deelstaat Stiermarke, met 'n bevolking van 9 899 soos op 1 Januarie 2019. Die stadsgebied strek oor 63,77 km² en is op 737 meter bo seevlak geleë teen die suidelike rand van die Aichfeld, 'n uitgestrekte bekken in die Alpebergreeks. Hier, by die kruispunt van belangrike handelsroetes, het teen die middel van die 11de eeu 'n burg ontstaan wat die nodige beskerming vir die vestiging van 'n mark- en koopmansdorp gebied het. In die loop van die Middeleeue het die nedersetting gegroei tot 'n ekonomiese en administratiewe sentrum.^[1]

Die oudste historiese verwysing na Judenburg as mercatum Judinburch dateer van 1074 en getuig van die belangrike rol wat Joodse handelaars destyds in die markdorp 'n gespeel het. Judenburg se welvaart het voortgespruit uit sy ligging en status as belangrikste handelspos langs die roete tussen Wene en Venesië asook die handel met ystererts, wat in Bo-Stiermarke ontgin is, en die plant Valeriana celtica waarvan die wortels danksy hul gehalte aan eteriese olies vir die vervaardiging van parfuum gebruik is.

Judenburg se vernaamste besienswaardighede is die stadstoring uit die 15de eeu (met 'n hoogte van 75,66 m die hoogste vrystaande kloktoring in Oostenryk) wat met sy uitsigplatform (op 'n hoogte van 42 m) 'n uitsig oor die hele Aichfeld bied en tans Europa se mees moderne planetarium huisves (wat met 'n moderne panorama-glashysbak bereik kan word - of deur die 256 trappe op te klim), die Rooms-Katolieke parogiekerk met die sogenaamde Judenburgse Madonna, 'n lewensgrootte-kalksteenskulptuur wat die Moeder Gods uitbeeld, en die Puch Museum wat belangrike mylpale in die geskiedenis van motorvervaardiging behandel.^[2]

• Austria-Forum: Judenburger Fernhandel