Lenni-Lenape

Die Lenape of Lenni-Lenape (die latere "Delawares", soos hulle genoem is deur die Europeërs) was omstreeks 1600 'n versameling los georganiseerde inheemse volkere in die gebied van die benede-Hudson en die Delaware. Die volk het bestaan uit onder andere die volgende afdelings: Minsi, Minisink (Munsee) en Muheconneok (Mahican: nie te verwar met die Mohegan-stam nie).

Die Lenni-Lenape word beskou as die oudste deel van die stam van die Anishinaabeg, 'n versameling Algonkies-sprekende volke in Noordoos-Amerika. Die Anishinaabe-volkere, waaronder die Ojibweg, die Odaawaag, die Potawatomi en die Omàmiwininiwak (Algonkin), en verwante volkere soos die Shawnee en die Abenaki, beskou die Lenni-Lenape nog altyd as hul voorganger.

Die Lenni Lenape het landbou op klein skaal beoefen om hul rondswerwende bestaan as jagter-versamelaars aan te vul. Die Lenape-Indiane was voor die koms van die eerste Nederlandse koloniste die oorspronklike bewoners van die gebied wat vandag die baai van New York en die Delaware-vallei uitmaak. Hul Algonquian-taal staan ook bekend as Lenape of Delaware. Die woorde moccasin, powwow, squaw, tomahawk en totem is uit hierdie taal afkomstig.

Teenswoordig woon daar Lenni-Lenape-gemeenskappe in die deelstate Colorado, Delaware, Kansas, New Jersey, Ohio, Oklahoma, Pennsilvanië en Wisconsin, en in die Kanadese provinsie Ontario.

Wikimedia Commons bevat media in verband met Lenape.

Hierdie artikel is in sy geheel of gedeeltelik vanuit die Nederlandse Wikipedia vertaal.

Hierdie artikel is ’n saadjie. Voel vry om Wikipedia te help deur dit uit te brei.