Mar del Plata

Mar del Plata
Stad
Byname:  La Perla del Atlántico, La Feliz, Mardel, Marpla
Mar del Plata
Koördinate: 38°0′12″S 57°33′10″W / 38.00333°S 57.55278°W / -38.00333; -57.55278
Land	Argentinië
Provinsie	Buenos Aires
Stigting	10 Februarie 1874
Regering
• Burgemeester	Guillermo Montenegro
Oppervlak
• Stedelik	79,48 km2 (30,69 vk. myl)
Hoogte	38 m (125 ft)
Bevolking
• Stad	614 350
• Metro	914 657
Tydsone	UTC-3 (ART)
• Somertyd	UTC-2 (ARST)
Poskode	7600
Skakelkodes	+54 223
Webwerf	mardelplata.gob.ar

Mar del Plata (Spaans: Silwersee) is die grootste en bekendste vakansieoord van Argentinië en lê op die rotsagtige skiereiland van Cabo Corrientes in die suidooste van die provinsie Buenos Aires, 404 kilometer van die hoofstad Buenos Aires af.

Die stad met 'n oppervlak van 79,48 vierkante kilometer en sowat 614 350 inwoners het die bynaam La Perla del Atlantico ("Die Pêrel van die Atlantiese Oseaan"). Mar del Plata se kuslyn strek oor sowat 47 kilometer. Sy strande word deur talle wolkekrabbers met woonstelle oorheers.

Mar del Plata lê aan die Suidelike Atlantiese Oseaan, aan die voet van die Sierra de los Padres. Die kuslyn wat van San Clemente del Tuyú in die noordooste tot by Monte Hermoso in die suide strek, staan bekend as die Atlantida Argentina. 'n Ander naam vir die streek met sy aantreklike vakansieoorde is Mar y Sierras (See en Gebergtes). Die omgewing is deel van die Argentynse Pampas-landskap. Die vogtige, gematigde klimaat word hoofsaaklik deur die oseaan beïnvloed. Die gemiddelde jaarlikse temperatuur is 14 °C.

Mar del Plata is in 1874 deur Patricio Peralta Ramos gestig en was aanvanklik net 'n klein hawestad met 'n soutfabriek. Met die aansluiting tot die nasionale spoorwegnet in 1886 het die aantal besoekers aansienlik gegroei, en in 1888 het die eerste hotel in Mar del Plata geopen. Die sakeman Pedro Luro het die voorbeeld van die Franse stad Biarritz gevolg en die stad binne enkele jare tot 'n gewilde toeristebestemming ontwikkel. Reeds in 1890 was Mar del Plata die gewildste vakansiebestemming in Argentinië, en die toerismebedryf was ook die dryfkrag agter Mar del Plata se vinige groei.

Aanvanklik was dit veral welgestelde porteños (inwoners van die hoofstad Buenos Aires) wat Mar del Plata se natuurskoon geniet het. In die dertigerjare van die 20ste eeu is die pad Ruta Nacional 2 geplavei wat die stad vir groter skare mense toeganklik gemaak het, terwyl ook die destydse opening van die casino die toerisme aangewakker het. Die bou van 'n tweede pad, die Ruta Provincial 11, het die ontwikkeling van kleiner strandoorde ten noorde en suide van Mar del Plata bevorder. Dit was een van die gasheerstede tydens die FIFA Sokker-Wêreldbekertoernooi in 1978.

Daar is sowat drie miljoen toeriste per jaar wat deur Mar del Plata se 20 km lang strande gelok word. Daar is min argitektoniese besienswaardighede, behalwe 'n aantal pragtige villa's wat aan die begin van die 20ste eeu in die stadswyk Los Troncos opgerig is. Die vissershawe met sy rooi en geel bote is 'n gewilde motief vir fotograwe. Dit is veral ook die naglewe wat besoekers trek, met die grootste casino van Argentinië en 'n aantal teaters, varietés en diskoteke. Die stad beskik oor 'n uitstekende infrastruktuur wat van eersterangse hotelle tot woonstelle alle soorte akkommodasie vir toeriste bied. Gholfbane, parke en wandellane langs die strand is in puik toestand.

In die somer vind 'n groot deel van Buenos Aires se kulturele aktiwiteite in Mar del Plata plaas. Die Internasionale Filmfees van Mar del Plata in November is die belangrikste in Argentinië en die bekendste van Latyns-Amerika.

Die toerisme is die vernaamste bron van inkomste en maak die stad afhanklik van groot getalle besoekers. Die gunstige wisselkoers lok nou ook meer buitelanders na Mar del Plata. Vissery is die ander belangrike ekonomiese basis. Plaaslik vervaardigde woltruie, wolhandskoene en ander produkte is goedkoop en gewilde soeweniers.

Die plaaslike kookkuns toon veral Italiaanse invloede sodat pasta, visgeregte en ander seekos die spyskaarte oorheers. Naby die vissershawe vind die besoeker 'n aantal uitstekende restaurante. 'n Spesialiteit van die stad is alfajores marplatenses, met sjokolade- of karamel gevulde beskuite vir die vyf-uur-tee.

Wikimedia Commons bevat media in verband met Mar del Plata.

• (en) Toerisme-inligting oor Mar del Plata op Wikivoyage
• (es) Amptelike webwerf