Maui

Maui Die Vallei-eiland
Satellietfoto van Maui
Geografie
Ligging	20°48′N 156°20′W / 20.800°N 156.333°W / 20.800; -156.333
Oppervlakte	1 883,5 vk km
Geranglys	2de grootste eiland van die deelstaat Hawaii
Hoogste punt	Haleakalā   3 055 m
Demografie
Bevolking	154 834 (2010)
Bevolkingsdigtheid	82,2/vk km
Amptelike simbole
Blom	Lokelani
Kleur	ʻĀkala (pienk)

Maui (Engels maʊ.iː, Hawais ˈmɐuwi) is die tweede grootste van die Hawaii-eilande met 'n oppervlak van 1 883,5 km² en die argipel se tweede jongste met 1,8 miljoen jaar. Dit is 112 kilometer wes van Oʻahu geleë. Maui maak deel uit van die Amerikaanse deelstaat Hawaii en is die grootste van Maui County se vier eilande.

Maui se bevolking, wat in 2010 154 834 beloop het, is die derde grootste van enige Hawaii-eiland (na Oʻahu en Hawaiʻi). Kahului is die grootste nedersetting op Maui met 'n bevolking van meer as 20 000.

In ekonomiese en demografiese opsig het Maui sedert die 1970's 'n ongekende opswaai beleef. Terwyl die verbouing van suikerriet en pynappels op die ander Hawaii-eilande intussen 'n minder belangrike rol speel, steun Maui se landboubedryf nog steeds swaar op hierdie gewasse, naas ander landbouprodukte soos aartappels en ander groente.

Die toenemende gewildheid as toeristebestemming het die plaaslike bevolking aansienlik laat groei – sedert 1970 het dit verdriedubbel. Die massatoerisme het intussen ook nadelige gevolge – dit plaas druk op die eiland se waterbronne en doen met grootskaalse ontwikkeling soos die bou van nuwe hotelle en woonbuurte ook die landskapsbeeld skade aan.