Nix (maan)

Nix   

’n Foto van Nix wat op 2015 deur die tuig New Horizons geneem is.
Ontdekking
Ontdek deur	Hubble-ruimteteleskoop Pluto-metgeselsoekspan
Datum	Junie 2005
Alternatiewe name	(134 340) Pluto II[1]
Wentelbaaneienskappe
Halwe lengteas	48 694±3 km[2]
Eksentrisiteit	0,002036±0,000050
Wentelperiode	24,85463±0,00003 d
Inklinasie	0,133±0,008 °
Satelliet van	Pluto
Fisiese eienskappe
Afmetings	56 × 26 km ± ?[3]
Rotasieperiode	Chaoties
Aksiale neiging	Veranderlik
	0,04–0,35 (geraam)[4]
Temperatuur	33–55 K
Skynmagnitude	23,38–23,7 (gemeet)[4]

Nix is ’n natuurlike satelliet van Pluto. Dit is in Junie 2005 saam met die dwergplaneet se verste maan, Hidra, ontdek en is in Julie 2015 saam met Pluto besoek deur die ruimtetuig New Horizons.^[5] Die nabyskote van Nix is nog nie van die New Horizons afgelaai nie, maar van die klein mane sou die tuig na verwagting die beste foto's van Nix neem.

Die maan is genoem na Nyx, in die Griekse mitologie die godin van duisternis en die nag en die ma van Charon, die bootsman van Hades (Pluto in die Romeinse mitologie). Die naam is op 21 Junie 2006 deur die Internasionale Sterrekundevereniging aangekondig,^[6] tesame met sy wetenskaplike naam, Pluto II, en die naam van Hidra. Die letters N en H van Nix en Hidra staan vir New Horizons, wat die motivering vir die neem van die foto's was. "Nix" word met ’n "i" gespel om verwarring met die asteroïde 3908 Nyx te voorkom. Volgens die USGS Gazetteer of Planetary Nomenclature is Nix die "Egiptiese spelling",^[7] terwyl Jürgen Blunck dit die "Spaanse spelling" van die Griekse naam noem.^[8] Die ander mane van Pluto (Styx, Charon en Kerberos) het ook name gekry uit die Griekse mitologie wat met die onderwêreld verband hou.

Nix is ontdek deur die Hubble-ruimteteleskoop se Pluto-metgeselsoekspan met onder andere Alan Stern. Die ontdekkingsfoto's is op 15 en 18 Mei 2005 geneem; Nix en Hidra is onafhanklik deur Max J. Mutchler (op 15 Junie 2005) en Andrew J. Steffl (op 15 Augustus 2005) ontdek. Die ontdekkings is op 31 Oktober 2005 aangekondig. Die mane is voorlopig S/2005 P 2 (Nix) en S/2005 P 1 (Hidra) genoem.^[9][6]

Nix is 56,3 × 25,7 km groot, wat dui op ’n baie lang vorm, en het ’n hoë albedo.^[10] Op 13 Julie 2015 het Nasa se New Horizons bepaal Nix is sowat 35 km in deursnee.^[11]

Die maan volg ’n sirkelvormige wentelbaan op dieselfde vlak as Charon. Dit is in ’n baanresonansie van 3:2 met Hidra en van 9:11 met Styx (die verhoudings dui op die getal omwentelings per eenheidtyd).^[12][2]

Sy wentelperiode is 24,9 dae en hy tuimel om sy eie as – die noordpool word periodiek die suidpool en omgekeerd.^[13]

• 
  Foto van die Pluto-stelsel uitgereik met die bekendstelling van die mane.
• 
  Ontdekkingsfoto's van Nix en Hidra.
• 
  ’n Voorstelling van hoe Nix onvoorspelbaar tuimel in sy wenteling. Gebaseer op ’n rekenaarsimulasie. Die oppervlakdetail is nie werklik nie^[14]

• Steffl, A. J.; Mutchler, M. J.; Weaver, H. A.; Stern, S. A.; Durda, D. D.; Terrell, D.; Merline, W. J.; Young, L. A.; Young, E. F.; Buie, M. W.; Spencer, J. R. (2006). "New Constraints on Additional Satellites of the Pluto System". The Astronomical Journal. 132 (2): 614–619. arXiv:astro-ph/0511837. Bibcode:2006AJ....132..614S. doi:10.1086/505424. {{cite journal}}: Onbekende parameter |lastauthoramp= geïgnoreer (hulp)(Final preprint)

• Nix-profiel Geargiveer 1 Augustus 2007 op Wayback Machine deur Nasa
• Agtergrond oor Nix en Hidra – die ontdekkers se webtuiste

• Wikimedia Commons het meer media in die kategorie Nix (maan).