P.A. Jacobs

Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas.

Petrus A. Jacobs is ’n township-dramaturg wat op Matroosfontein in die Kaap bly. Jacobs se dramas bevat meestal religieuse en/of liefdes temas.

In 1957 begin sy bemoeienis met die teater wanneer hy begin om toneelstukke op te voer saam met sy kerkjeug onder die naam Inspirations Theatre Group. Hierdie groep verander in 1960 hulle naam na die United Youth Crusaders, wat in 1971 Alpha Omega word.^[1] Hierdie groep is verantwoordelik vir meeste van die opvoerings van sy dramas. Hulle motto is “Prestasie eis moed – oorwinning na die stryd”. Aanvanklik is hulle in Elsiesrivier gebaseer, maar verskuif later na Nooitgedacht.^[2] Vir lank is hy regisseur van die opvoerings van sy dramas en vertolk hy self rolle daarin. Hy is in Maart 2004 na ’n lang siekbed in die Karl Bremer-hospitaal in Bellville oorlede.

Hy skryf sowat dertig ongepubliseerde dramas, van veral religieus-didakties en sentimenteel-romantiese aard. Hierdie dramas sluit in “As die galgtou weer swaai”, “Die koms van Lord Gladystone”, “Die goue kandelaar”, “Die hart van die mens”, “Daar’s ’n reënboog in haar oë”, “In haar trourok op sy graf”, “So eg die liefde”, “Maak oop die graf van my moeder”, “Vreemde skoen onder my bed”, “Pieter se troue”, “Spelonk van onheil”, “Die waarde van ’n glimlag”, “Bloed is dikker as water”, “Stiefseun se geliefde”, “In die glans van die gloeiende panga”, “Uurtjie van lof”, “Oorlede Louw se bos”, “In die skadu van die sipres” en “Haar belofte aan Mammie”. Laasgenoemde word onder andere in April 1986 op Saron in die Kaapse Vlakte opgevoer. Kort voor sy dood voltooi hy ’n gewyde drama vir die New Heritage Church van Montana.

• Anoniem: Drama op Vlakte steeds lewendig” “Die Burger” 26 Augustus 1988
• Anoniem “Dramaturg (71) sterf” “Kaap-Rapport” 7 Maart 2004
• Eie korrespondente “Lid van toneelgroep sterf ná aanranding” “Die Burger” 23 Oktober 1992

• Die Burger: http://152.111.1.87/argief/berigte/dieburger/1986/04/04/14/12.html
• Die Burger: http://m24arg02.naspers.com/argief/berigte/dieburger/1988/08/26/21/2.html^{[dooie skakel]}
• Rapport: http://152.111.1.87/argief/berigte/rapport/2004/03/07/KR/02/04.html^{[dooie skakel]}