Rondebosch-meent

Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas.

Die Rondebosch-meent in Kaapstad is 'n erfenisgebied wat sowel 'n historiese as 'n natuurmonument is. Dit is 'n vry toeganklike gebied met verskeie wandel- en drafpaadjies en is eiendom van die stad.

Hierdie park in die ou stedelike gebied van Kaapstad word omring deur die stadsdele Mowbray, Rosebank, Park Estate en Rondebosch. Die bekende strate Klipfontein-, Campground-, Milner- en Parkweg vorm die huidige buitegrense. Rondom die meent is bekende instellings gehuisves, soos die Rooikruis-kinderhospitaal, Vista Nova-skool vir serebraal gestremdes, William Slater-hospitaal, Rustenburg Girls' High School en die Kaapse hoofkantoor van die onderwysersvakbond Naptosa.

Argeologiese ondersoek het aangetoon dat Khoikhoi-veeboere reeds die terrein gebruik het. In 1805 het goew. Jan Willem Janssens die troepe van die Bataafse Republiek hier laat saamtrek voor die Slag van Blaauwberg. En na hul oorname van die Kaap het die Britse soldate hier kamp opgeslaan. Vandaar die naam van die straat aan die westekant. Tussen die jare 1854 en 1902 is dit beskikbaar gestel aan die Anglikaanse St. Paulusgemeente om hul beeste daar te laat wei op voorwaarde dat die publiek nogtans toegang tot die terrein sou hê. In 1890 is die deel oos van die huidige Milnerweg van die meent afgesny en is die buurt Park Estate ontwikkel. Die dennebome op die terrein is 'n oorblyfsel van 'n heining rondom 'n begraafplaas.

Die meent is 'n belangrike bewaringsgebied vir die uiters bedreigde Kaapse Vlakte-sandfynbos. Aan die westekant is 'n stukkie renosterveld en aan die noordoostekant 'n stuk strandveld. Daar kom 240 inheemse plantspesies voor, waarvan 22 bedreig en 9 voorkom op die Rooi Datalys. Die dierelewe bestaan uit 'n ryke verskeidenheid soogdiere, paddas en insekte. 'n Honderd en tien voëlsoorte is daar alreeds aangeteken.

Die Rondebosch-meent is in 1961 tot 'n nasionale gedenkwaardigheid verklaar. Sedert 2003 is dit 'n provinsiale erfenisgebied van die Wes-Kaap.

In die William Fehr-versameling is 'n ongedateerde skildery van die meent deur S.P. Boshof.

Wikimedia Commons bevat media in verband met Rondebosch Common.

• Oberholster, J.J.: Die historiese monumente van Suid-Afrika. Kaapstad: Kultuurstigting Rembrandt van Rijn vir die Raad vir Nasionale Gedenkwaardighede, 1972. ISBN 0-620-00191-7

33°57′20″S 18°29′00″O / 33.95556°S 18.48333°O / -33.95556; 18.48333