Royal Albert Hall

Royal Albert Hall
Adres	Kensington Gore, South Kensington
Stadsdeel	Kensington, Londen
Land	Verenigde Koninkryk
Opgerig	1867–1871
Hoogte	41 m
Webtuiste	royalalberthall.com

Die Royal Albert Hall is 'n konsertsaal in die mees noordelike deel van Kensington in westelike Sentraal-Londen wat internasional bekend staan vir sy Proms-konsertreekse wat sedert 1941 jaarliks in die somermaande aangebied word. Die saal het 'n maksimum-kapasiteit van 5 272 sitplekke, afhangende van die gebeurtenis. Die uitleg van die verhoog en die getal staanplekke kan aangepas word sodat die getal sitplekke styg of verminder. Die konsertsaal word nie deur die Britse regering of Londense administrasie befonds nie, maar is 'n geregistreerde nie-winsgewende instelling.

Sedert sy amptelike inwyding deur koningin Victoria in 1871 het die wêreld se leidende kunstenaars uit verskillende genres in die Royal Albert Hall opgetree. Die konsertsaal het sodoende een van die Verenigde Koninkryk se gewildste en merkwaardigste geboue geword. Jaarliks vind meer as 350 gebeurtenisse in die saal se groot amfiteater plaas, waaronder klassieke konserte, rock en pop, ballet- en opera-opvoerings, sportwedstryde, toekenningsplegtighede, skool- en gemeenskapsfeeste, liefdadigheidsfunksies en bankette.

Oorspronklik is beplan om die konsertsaal The Central Hall of Arts and Sciences te noem, maar ter nagedagtenis van haar wyle gade prins Albert is dit deur koningin Victoria gewysig tot Royal Albert Hall toe sy die hoeksteen gelê het. Terwyl die konsertsaal die praktiese deel van die nasionale gedenkteken vir die Prinsgemaal vorm, is die dekoratiewe deel, die Albert Memorial, net noord daarvan in Kensington Gardens en anderkant Kensington Gore-straat opgerig.

• Wikimedia Commons het meer media in die kategorie Royal Albert Hall.
• (en) Amptelike webwerf

51°30′4″N 0°10′39″W / 51.50111°N 0.17750°W / 51.50111; -0.17750