Saskia Goldschmidt

Saskia Goldschmidt
Gebore	1954 Amsterdam
Nasionaliteit	Nederland
Beroep	Skryweres, romansier

Saskia Goldschmidt (gebore in 1954 in Amsterdam)^[1] is 'n Nederlandse skryfster en romansier.^[2]

Saskia Goldschmidt het haar debuut in 2011 gemaak met Verplicht gelukkig, portret van een familie, waarin sy ondersoek hoe die trauma van ouers wat onderhewig is aan oorlewingskuld oorgedra word aan die na-oorlogse generasie. Elsbeth Etty het oor hierdie debuut in NRC geskryf: "'n Pragtig saamgestelde en sterk geskrewe verhaal. 'n Persoonlike storie wat, ten spyte van die spesifieke konteks daarvan, tydloos is en van toepassing is op alle situasies. Pynlik bevrydend..."

Hierna volg haar eerste roman, De Hormoonfabriek. Dit is in Afrikaans vertaal deur Daniël Hugo en in Desember 2014 as Die Hormoonfabriek deur Protea Boekhuis uitgegee. Dit handel onder meer oor die liefde en venyn tussen broers, botsende belange tussen handel en wetenskap, vroulike fabriekswerkers wat met sekshormone volgestop word en testosteroongedrewe base. Die Hormoonfabriek is geïnspireer deur histories feite waarin die onderskeid tussen goed en kwaad soms vertroebel raak deur die opwinding van wetenskaplike ontdekkings.^[3] Die boek was op die lys geplaas vir die Libris Literatuurprys en is benoem vir die Euregio-prys. Vertalings daarvan het in die Verenigde State, Duitsland, Frankryk, Suid-Afrika, Engeland, Turkye en Bulgarye verskyn.

Goldschmidt het saam met die radiovervaardiger en -skrywer Peter te Nuyl die draaiboek geskryf vir die gelyknamige twaalf en 'n halfuur lange potgooi wat op Radio 1 uitgesaai is. Filmtalents, die produksiemaatskappy van Jaques Audiard, het 'n opsie geneem op die rolprentregte daarvan.

In 2015 is De Voddenkoningin gepubliseer, waarvan die Duitse vertaling in Junie 2018 deur DTV gepubliseer is as Die Vintage Queen. Goldschmidt woon sedert 2016 op die hoogland van Groningen in 'n klein woning buite die dorp.

Sy het ook die boek Schokland geskryf. Voordat Goldschmidt voltyds gefokus het op skryf was sy dertig jaar lank 'n dramaturg, vervaardiger en onderwyser. Sy het saamgewerk met verskeie jeugteaters en -maatskappye soos Theatergroep Wederzijds, Sonnevanck, Artemis, Dox en Wijnand Stomp. Sy het verskeie projekte saam met die choreograaf Sassan Saghar Yaghmai en Ad de Bont aangepak.

Sy was ook 'n projekbestuurder by Tropenmuseum Junior waar sy drie jaar lank 'n uitruilprojek tussen kinders van Amsterdam en Teheran organiseer het. Sy het vir twintig jaar as aktrise en mede-opleidingsbeampte vir verskeie organisasies gewerk, maar hoofsaaklik vir AMC. Goldschmidt help ook skrywers en joernaliste met die aanbied en voorbereiding van hul werk vir die auteursbond en NVJ Akademie.^[4]