Smalkop-kurper

Smalkopkurper
Bewaringstatus
Veilig  (IUCN 3.1)
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Subfilum:	Vertebrata (Cuvier, 1812)
Infrafilum:	Gnathostomata
Superklas:	Osteichthyes (Huxley, 1880)
Klas:	Actinopterygii
Subklas:	Neopterygii
Infraklas:	Teleostei
Superorde:	Acanthopterygii
Orde:	Perciformes
Familie:	Cichlidae
Subfamilie:	Pseudocrenilabrinae
Genus:	Serranochromis (Regan, 1920)[1]
Spesie:	S. angusticeps
Binomiale naam
Serranochromis angusticeps (Boulenger, 1907)[2]

Die smalkopkurper (Serranochromis angusticeps) is 'n varswatervis wat voorkom in die Okavangorivier, Kunenerivier, boonste gedeelte van die Zambezirivier en die Kafuerivier. Dit kom ook in die sytakke van die Kongorivier in Zambië voor.

In Engels staan die vis bekend as die Thinface largemouth of die Thinface bream.

Die smalkopkurper het 'n groot kop met klein oë en 'n skuinsbek wat soos 'n konsertina oopvou. Die kop en lyf is redelik plat. Daar is drie tot vier rye enkelpunt, klein tandjies in die bokaak en twee tot drie rye onder. Die onderste keeltandbeen is smal en lank, met lang dun, enkel- of dubbelgepunte tande.

Die kop en lyf van beide geslagte het kenmerkende rooi kolletjies op. Volwasse mannetjies het 'n heldergeel kop en die stert- en dorsalevinne is blougrys met donker bruin kolle, die anale vin is geel met oranje kolletjies op. Die gespikkelde bek, wange en kiefdeksels is uniek aan die vis.

Die skubbe is grof en daar is 35 tot 39 op die systreep.

Die vis word tot 41 cm lank en die Zimbabwe-hengelrekord is 2.195 kg.

Die smalkopkurper kom in alle tipes water voor maar verkies diep en stil water en lagunes met digte plantegroei.

Die vis se plat vorm help hom om ander visse te bekruip soos spesies van die genera Brycinus en Micralestes.

Hulle broei in die somer; die mannetjies maak neste by die plantegroei in water wat 1–3 m diep is.

Die smalkopkurper is 'n goeie sport- en eetvis. Alle tipes kunsaas werk goed, maar swaailemme is van die beste. Vir die beste hengel resultate moet die swaailem, lepel of kunsvissie, óf so na as moontlik aan die bodem óf so na as moontlik aan die plantegroei of rivierwal ingebring word.

Erdwurms, visaas of klein vissies, asook insekte werk goed. Waar tiervis afwesig is, of nie so volop is nie, kan lewendige aas soos die Imberi (Tweekol Tiervis), net onder 'n stroomversnelling gehengel, baie goeie resultate oplewer.

Dieselfde aas en hengeltegnieke wat vir die bloukurper gebruik word, kan ook met groot vrug op roofkurpers soos die smalkopkurper gebruik word.

Die naam smalkop dui op die afstand tussen die oë. Hierdie vis was aanvanklik verwar met die kromkop-kurper en die twee was eers as 'n enkele spesie beskou.

• Alfabetiese lys van visse
• Kurper
• Lys van Suider-Afrikaanse visse volgens wetenskaplike name
• Lys van varswater visfamilies
• Lys van visfamilies

• Skelton, Paul: A Complete Guide to the FRESHWATER FISHES of Southern Africa. 2001. ISBN 978-1-86872-643-1
• Botha, Willem: Hengelvisse in die Caprivi. 1984.

• http://fishbase.org/summary/Serranochromis-angusticeps.html