Trol

Die term trol is 'n versamelnaam vir verskeie tipes lelike, mensagtige wesens uit die Nordiese volksdigkuns en tradisionele sprokieswêreld wat hulle wortels in die Oud-Nordiese mitologie het. Alhoewel hul voorkoms en hul eienskappe op verskillende maniere uitgebeeld word, word trolle nogtans meestal as gevaarlik en dom beskryf. Trolle woon by voorkeur in ontoeganklike plekke en natuurgebiede soos byvoorbeeld in die grotte van berge en bosse of in seegrotte.

Die oorsprong van die woord trol is onduidelik. Daar is reeds beweer dat daar 'n verbintenis met die ou Germaanse woord vir "vermorsel" of "wankel" sou bestaan, terwyl ander deskundiges aanneem dat dit 'n afgeswakte of vroulike vorm van 'n ouer woord kan wees wat nou onbekend is. Trolle is in Noors 'n variant van die woord trylle ("toor"), ongeag die verskillende uitgangspunt van die twee terme. Oorspronklik het trolle dus letterlik "towerkuns beoefen" beteken, of trylling ("towerkuns") het sy etimologiese wortels in trolldom (die Noorse woord vir heksery), trollskap en trollmakt ("trolmag").

In figuurlike taal verwys die term trol dikwels na 'n persoon wat onmanierlik en onbeskof teenoor iemand optree. Deesdae word die term trol of internet-trol veral in Engels gebruik om na iemand te verwys wat byvoorbeeld 'n diskussieforum met sy beledigende of haatlike bydraes probeer steur.

Daar is gehipotetiseer dat die trolmite sy oorsprong in werklike interaksies tussen anatomies moderne mense en Neanderdallers kan hê.^[1][2]

• Hierdie artikel, of gedeeltes daarvan, is uit die volgende Wikipedia-artikel vertaal: Troll